Ish-trajnerit bardheblu Tirana duhet t'i paguajë 800.000 lekë për mosrespektim të kontratës, ndërsa Beqiri "lirohet" nga Partizani.

Dy çështjet e shqyrtuara dje në mbledhjen e komisionit të disiplinës janë zgjidhur në favorin e ish-trajnerit Astrit Hafizi dhe futbollistit Ardit Beqiri. Sipas vendimit, Tirana duhet t'i paguajë Hafizit dy rroga mujore, të cilat kapin shifrën e 800.000 lekëve. Në bazë të rishikimit të kontratës që ka nënshkruar Hafizi me bardheblutë, rezultoi e drejtë ankesa e ish-trajnerit të kombëtares, që është shkarkuar nga drejtimi i Tiranës pas barazimit 2-2 me Elbasanin, në sezonin e kaluar. Ndërkohë, për sa i përket futbollistit Ardit Beqiri, i cili në kampionatin e fundit ishte pjesë e Partizanit, disiplina vendosi zgjidhjen e kontratës së tij me klubin e kuq. Tashmë, Beqiri është i lirë për t'u aktivizuar me çdo ekip tjetër. Gjithashtu, klubi "Partizani" duhet t'i shlyejë ish-kapitenit pagën e muajve mars, prill dhe maj, të cilat i përkasin vitit të parë të kontratës. Kërkesa e futbollistit për shlyerjen edhe të rrogës së katërt është cilësuar e pabazuar në rregullore nga disiplina. Përveç këtyre dy çështjeve, komisioni vendosi të lërë të lirë futbollistin Elio Shazivari, të cilit i ka përfunduar kontrata dhe nuk ka detyrime ndaj klubit të Laçit. Ndërsa për ngjarjet e javës së parë të kategorisë superiore, disiplina gjobiti me 30.000 lekë futbollistin e Bylisit, Johan Driza, gjithashtu e pezulloi me një ndeshje për shkak të ofendimit ndaj gjyqtarit në ndeshjen përballë Shkumbinit.

Kategoria superiore

Java e 2-të (30.08.2008)

Dinamo - Shkumbini

Gjyqtar: M.Sopjani

Bylis - Besa

Gjyqtar: A.Lulaj

Teuta - Tirana

Gjyqtar: S.Çekaj

Të dielën

Flamurtari - Elbasani

Gjyqtar: K.Meta

Apolonia - Lushnja

Gjyqtar: E.Dobi

Partizani - Vllaznia

Gjyqtar: B.Pashaj