Pavarësisht një Europiani zhgënjyes, Rajmond Domenek është konfirmuar në krye të kombëtares franceze deri në vitin 2010. Ka qenë ky vendimi i marrë nga Këshilli Drejtues i Federatës Franceze në mbledhjen e së enjtes. Presidenti Zhan-Pier Eskalet, deklaroi në një konferencë për shtyp se vendimi kishte të bënte me një çështje morale, duke qenë se Domenek ka një kontratë deri në vitin 2010 me këtë Federatë. Vendimi është marrë me 19 vota pro dhe një abstenim, por pavarësisht kësaj, ka qenë i papritur për opinionin francez. Domenek u përball me akuza të ashpra pas eleminimit të Francës që në ndeshjet në grupe të kampionatit europian. Vetëm një pikë, një gol i shënuar dhe gjashtë të pësuar, i kthyen nënkampionët e botës në një skuadër qesharake. Sidomos organet e shtypit kanë qenë tejet kritike ndaj Domenek, që la në shtëpi disa yje si Trezege, Flamini apo Mekses. Në krahun e Domenek ishin rreshtuar në ditët e shkuara kapiteni Patrik Vieira, mesfushori Frenk Riberi dhe presidenti i UEFA-s Mishel Platini. Një nga kundërshtarët e tij ka qenë Zinedine Zidane, që kërkoi ngjitjen e Didier Deshamp në stolin e kombëtares. Veç kësaj, Domenek është kritikuar shumë edhe për raportet e tij aspak miqësore me një pjesë të skuadrës, por sidomos me shtypin. (a.r-news24/balkanweb)