Ka nisur punën komisioni katër palësh i FIFA-s, UEFA-s, Ministrisë së Sporteve dhe Federatës së Futbollit, që do t’u japë zgjidhje problemeve të mbetura pezull që nga koha e konfliktit të madh që përfshiu futbollin shqiptar me shtetin. Shefi i zyrës juridike të UEFA-s Marsel Benc, delegatja Eva Paskuer dhe drejtoresha e sporteve Violeta Shqevi janë takuar me drejtuesit e Federatës Shqiptare të Futbollit në zyrat e kësaj të fundit. Ideja për këtë komision katër palësh lindi në momentin e zgjidhjes së konfliktit mes shtetit shqiptar dhe FIFA-s në muajin prill. Bisedimet do të çojnë në gjetjen e një zgjidhje të pranueshme nga të gjithë, sidomos në aspektin e ligjeve që rregullojnë veprimtarinë financiare të futbollit në Shqipëri. Sidomos ligji për të drejtën televizive të kombëtares, do të jetë në qendër të këtyre bisedimeve. Palët nuk kanë pranuar të bëjnë komente, duke e quajtur punën e komisionit si të aspektit teknik dhe që do të çojë në rregullimin e kuadrit ligjor. Të shtunën, takimi do të vijojë me përfaqësues të Ministrisë së Financave, e cila gjithashtu ka objeksionet e saj në mënyrat sesi ndahen paratë nga e drejta televizive apo taksat e ndryshme që lidhen me futbollin. (a.r-news24/balkanweb)