Champions League ka nisur rrugën e saj edhe për këtë edicion, me 32 skuadra që kanë njohur kundërshtarët e tyre për fazën në grupe. Në Monte Karlo është hedhur shorti i sezonit të ri, që si rrallë herë sheh të marrin pjesë shumë ekipe të Lindjes. Dy skuadra rumune, dy ukrainase, një ruse, Fenerbahçe nga Turqia dhe Bate Borisov nga Bjellorusia, konfirmojnë se futbolli në vendet lindore tashmë është në një stad tjetër.
Sa u përket grupeve, ajo që vihet re është një balancë mes skuadrave të mëdha dhe atyre të vogla. Në grupin A, Celsi ka për kundërshtarë Romën, Bordonë dhe rumunët e Klyzh. Një short i lehtë për nënkampionët e Evropës që këtë vit shihen si një nga favoritët kryesorë për fitimin e trofeut. Në grupin B gjendet Interi, Verder Bremen, Panathinaikosi dhe Anorthosi i portierit shqiptar Arjan Beqaj, që për herë të parë merr pjesë në fazën në grupe. Barcelona e Pep Guardiolës dhe Leo Mesit ka rënë në grupin C së bashku me Sportingun e Lisbonës, Bazelin dhe ukrainasit e Shaktjor Donjeck. Në grupin D, Liverpuli gjen PSV Eindhoven, Marsejën dhe Atletikon e Madridit. Kampionët e Evropës të Mançester Junajtid do ta nisin mbrojtjen e titullit nga një grup ku bëjnë pjesë edhe Vilareali, Sëlltiku dhe danezët e Alborgut. Duke parë kundërshtarët, kalimi i grupit nuk duhet të jetë shumë problem për “Djajtë e Kuq”. Ndërsa Bajerni i Mynihut rikthehet në Champions League, duke gjetur përballë Lionin, Steauan e Bukureshtit dhe Fiorentinën, në një grup që parashikohet nga më të fortët. Ndërsa Arsenali i Arsen Venger, do të ndeshet me Porton, Fenerbahçen dhe Dinamon e Kievit. Grupi i fundit, ai H, do të vendosë përballë dy prej skuadrave më të mëdha të Evropës, Realin e Madridit dhe Juventusin, ndërsa dy kundërshtarët e tjerë janë rusët e Zenit Shën Petërsburg dhe bjellorusëy e Bate Borisov.
Liga e Kampioneve do të startojë fazën e saj në grupe në datat 16 dhe 17 shtator, për të përfunduar më 10 dhjetor. Në fillim të vitit të ardhshëm do të jetë faza me eleminim direkt, ndërsa finalja do të luhet më 27 maj në stadiumin “Olimpiko” të Romës.
(a.r/balkanweb)