Bajerni i Mynihut ka prezantuar Jurgen Klinsman si trajnerin e ri të klubit, duke zëvendësuar në këtë mënyrë të larguarin drejt Zvicrës Otmar Hitcfeld. Ishin 120 gazetarë që kanë pritur ish-teknikun e kombëtares gjermane, në një nga sallat e konferencave në stadiumin Allianz Arena. Në fjalët e para për mediat, Klinsman deklaroi se synimi i tij i parë është që çdo futbollist ta bëjë më të mirë se ç’është tani. Një tjetër objektiv i Bajernit do të jetë edhe Champions League, pas një viti në Kupën UEFA. Për të, është eksperienca e parë si një trajner klubi, pasi kishte drejtuar më parë kombëtaren gjermane në Botërorin e vitit 2006. Bavarezët do të debutojnë në Bundesligë më 15 gusht kundër Hamburgut, një nga skuadrat më të forta të kampionatit. “Nga Bajerni priten shumë gjëra. Duam të fitojmë titujt në Gjermani dhe të ecim sa më larg në Champions. Edhe ditën e stërvitjes do të luajmë me entuziazëm dhe dëshirë”, deklaroi Jurgen Klinsman përpara mediave. 
(a.r-news24/balkanweb)