Edhe pse arriti misionin e tij në jetë duke thyer rekordin e 8 medaljeve në një Olimpiadë, Majkëll Felps nuk ka ndërmend të tërhiqet nga sporti. Notari amerikan mund të rrinte dhe të shijonte milionat e dollarëve që do të përfitojë pas Lojërave të Pekinit, por në fakt nuk është aspak kështu. Felps ka deklaruar se do të jetë edhe në Olimpiadën e Londrës në vitin 2012, duke synuar që ta çojë rekordin e tij në 9 medalje. “Nuk ia kamn idenë se kur do të dalë sërish të stërvitem, pasi për momentin do të mundohem të pushoj pak. Ndoshta nuk do të qëndroj gjatë me pushime, pasi unë jam mësuar të jem gjithnjë aktiv, të lëviz dhe të stërvitem”, deklaroi Felps në një konferencë për shtyp të organizuar nga sponsorja e tij kryesore, kompania e kartave të kreditit Viza. Majkëll Felps e ka kaluar vitin e fundit në pishinë, duke bërë mijëra xhiro për të arritur objektivin e tij. Për të ardhmen, Felps thotë se bashkë me trajnerin e tij Bob Bauman, do të provojnë programe të reja stërvitje, ku do të tentojë të përmirësohet në stilin flutur dhe në 100 metra stil i lirë. Turneu i parë ku Felps do të marrë pjesë pas Olimpiadës, është kampionati botëror që do të zhvillohet në Romë në vitin 2009.
(a.r/balkanweb)