PEKIN- Shuhet dhe shpresa e fundit e përfaqësueses Kombëtare në Lojrat Olimpike “Pekin 2008”. Mundësi kosovar Sait Prizreni i cili mbajti dhe flamurin e delegacionit shqiptar në ceremoninë e hapjes së lojrave, u mund nga Bazarguev. Sait Prizreni u eliminua në raundin e II duke mbyllur përfundimisht garën e tij, por edhe të gjithë përfaqësueses shqiptare. Përvec peshëngritëses Romela Bega, e cila zuri vendin e gjashtë në botë në peshën 58 kilogram, duke ngritur 216 kilogram në dy garësh, asnjë atlet tjetër shqiptar nuk arriti të zinte vend të mirë në këto lojra Olimpike.

Tre ditë më parë më 16 gusht atletja shqiptare Klodiana Shala nuk arriti të kualifikohet në garën 400 metra. Atletja shqiptare doli e 7-ta në baterinë e saj kualifikuese dhe e 46-ta në përfundim të garës, duke shënuar kohën 54.84 sekonda. Me këtë rezultat Shala nuk arriti të vendosë as rekordin e saj personal.

Më 15 gusht atleti Dorian Collaku konkuroi në garën për hedhjen e çekiçit. Në renditjen përfundimtare Çollaku u rendit i 28-ti nga, duke mos u kualifikuar në fazën finale të kësaj disipline. Pas tre provave, Collaku arriti deri në 70.98 metra, një provë që ishte 6 metra më e vogël se rekordi i tij personal. Sportisti kuqezi mundi të lërë pas vetëm argjentinasin Inacio Huan Seria me 70.16 metra. Gjithsesi, rezultati i 31-vjeçarit ishte më i mirë se ai i arritur në Lojërat Olimpike "Athinë 2004", ku arriti në 70.06 metra.

As notarja shqiptare Rovena Marku nuk arriti të kualifikohej për në fazën gjysmëfinale të garës 50 metra stil i lirë, që u zhvilluan më 15 gusht. Megjithatë ajo theu rekordin kombëtar me gati 0.60 sekonda, çka ishte edhe objektivi i saj në Olimpiadën kineze.

Më 14 gusht garoi sportisti më i ri i delegacionit shqiptar në lojrat Olimpike. Sidni Hoxha,vetëm 16 vjec, garoi në not 50 metra stil i lirë. Ai arriti kohën prej 24.56 sekonda, duke thyer rekordin kombëtar, por ky rezultat nuk e lejoi të kualifikohet në gjysmë finale. 16 vjecari Sidni Hoxha arriti vendin e dytë në baterinë e tij kualifikuese.

Më 14 gusht konkuroi dhe mundësi shqiptar Elis Guri. Ai e mbylli garën duke qenë fare pranë medaljes së bronxit. Guri u eliminua nga mundësi Korean Han Tye Yeong, në mundje greko- romake në peshën 96 kilogram.

Më 13 gusht qitësja shqiptare Lindita Kodra konkuroi në garën qitje me pistoletë në 25 metra dhe u rendit e 35-ta në provat kualifikuese. Ajo arriti të grumbullojë një total prej 283 pikësh pas 3 serive gjuajtjesh. Edhe në garën qitje me pistoletë në ajër nga 10 metra, që u zhvillua më 10 gusht qitësja kuksiane nuk arriti rezultat të mirë. Ajo u rendit e 40 nga 44 konkurentët që morën pjesë në këtë garë.

(s.g/Balkanweb)