SHQIPERI- Deri në fund të sezonit, Shqipëria do të ketë shtatë stadiume me drita, ç’ka do të bëjë që kampionati shqiptar të luhet përgjithësisht në darkë. Përveç stadiumit “Qemal Stafa” në Tiranë dhe “Loro Boriçi” në Shkodër, me drita do të bëhen edhe impiantet e qyteteve të Elbasanit, Korçës, Durrësit, Lushnjës dhe Vlorës. Projekti më i ri do të nisë nga realizimi shumë shpejt dhe do të financohet nga Federata e Futbollit në bashkëpunim me bashkitë e këtyre qyteteve. Burime zyrtare nga Federata bënë të ditur se paratë për të do të ndahen gjysmë për gjysmë me bashkitë, teksa pritet që punimet për vënien e prozhektorëve të përfundojnë përpara mbarimit të këtij sezoni. Një gjë e tillë do të bëjë që shumica e ndeshjeve të Superligës, të luhet në orët e mbrëmjes, ç’ka parashikon edhe një rritje të numrit të tifozëve. Shqipëria është një nga vendet e pakta në rajon që ka vetëm dy stadiume ku ndeshjet mund të luhen natën.

(a.r/balkanweb)