Ka nisur mjaft keq për shqiptarët sezoni i ri në Bundesligë. Karslruhe e Edmond Kapllanit në fakt ka marrë 3 pikët e para, pas fitores 1-0 ndaj Bokumit, por sulmuesi i kombëtares shqiptare ka ngrohur stolin për 90 minuta. Ndërkohë, kapiteni i kombëtares, Altin Lala, është ndëshkuar me karton të verdhë në sfidën që skuadra e tij Hanover ka humbur 3-0 në fushën e gjigandëve të Shalke 04. 32-vjeçari Lala ishte titullar dhe luajti gjithë ndeshjen për Hanoverin, që pësoi humbjen më të thellë për këtë javë të parë. Ndërsa skuadra e Energji Kotbus, për të cilën aktivizohet mesfushori Ervin Skela, e ka nisur gjithashtu me humbje edicionin 2008/09 të Bundesligës. Kotbusi humbi në shtëpi me rezultat të thellë 3-0 nga skuadra e sapongjitur në Bundesliga 1, Hofenhaimi. 31-vjeçari Skela luajti 90 minuta për Kotbusin. Të premten ndërkohë ka debutuar edhe Jahmir Hyka, skuadra e të cilit, Mainz, barazoi 3-3 në shtëpi me Kaizerslauternin. 20-vjeçari Hyka në lojë hyri në minutën e 81-të në vend të sllovakut Miroslav Karhan. Hyka në Mainz u transferua muajin e kaluar nga Tirana.

(s.g/GazetaShqiptare/Balkanweb)