Kombëtarja Shpresa synon fitoren në ndeshjen e së mërkurës kundër Greqisë, e vlefshme për eleminatoret e kampionatit europian të vitit 2009. Nën drejtimin e trajnerit Artan Bushati, kuqezinjtë 21 vjeçarë janë në përgatitjet e fundit për këtë sfidë, që mbart një rivalitet të veçantë. Për grekët do të mungojnë dyshja shqiptare Nini e Dhimuço, por pavarësisht kësaj, objektivi i tyre është vetëm fitorja, në të kundërt ata do të jenë shumë larg kualifikimit. Trajneri Bushati theksoi përpara këtij takimi se ekipi i drejtuar prej tij do të mundohet të japë më të mirën përpara publikut të vet, duke synuar vetëm fitoren. Ndeshja mes Shqipërisë dhe Greqisë do të luhet të mërkurën në stadiumin “Rruzhdi Bizhuta” të Elbasanit. Ajo ishte e planifikuar për t’u zhvilluar në muajin mars, por për shkak të pezullimit të FIFA-s, u shty për më 20 gusht. Në grupin 1 të Euro 2009, Greqia ndodhet në vendin e tretë me 13 pikë, ndërsa Shqipëria gjendet në kuotën e 10 pikëve. (a.r/balkanweb)