Numri 1 i botës Rafael Nadal mundi 3-0 me sete amerikanin Rajler De Hart, për të kaluar në turin e tretë të Grand Slemit U.S. Open. 6-1 6-2 6-4, që panë spanjollin ta fitonte lehtësisht takimin. Nadal ishte i saktë në 70 përqind të shërbimeve të tij, gjë që në fund bëri diferencën. Përpos kësaj, kundërshtari i spanjollit ishte i një niveli të ulët, duke qenë se De Hart mban vendin e 261-të në renditjen botërore. Nadal pati hasur shumë vështirësi në raundin e parë, por tashmë spanjolli duket se iu është rikthyer lojërave të bukura.
Surpriza e parë e US Open ishte eleminimi i Ana Ivanoviç nga francezja e panjohur Xhuli Koin. Kjo e fundit merr pjesë për herë të parë në një Grand Slem, por arriti të zhvillonte një ndeshje të jashtëzakonshme duke fituar në shifrat 6-3, 4-6, 6-3. Ndeshja zgjati një orë e 57 minuta dhe spektatorët e pranishëm në “Artur Ashe Stadium” përjetuan një dramë të vërtetë të tenistes serbe. Ndërkohë, Venus Uilliams ka vazhduar për në raundin tjetër, pas fitores së lehtë 6-0, 6-3 ndaj paraguajanes Rosana De Los Rios.
(a.r/balkanweb)