Prishtinë, 13 maj - Prishtina arriti ta mposhtë Besën e Pejës me rezultatin e thellë, 5:1. Zejnullahu asistoi tre herë dhe shënoi një gol në fitoren e "bardhekaltërve" në ndeshjen që u zhvillua të dielën në Prishtinë dhe i takoi xhiros së 29-të të Raiffeisen Superligës së Kosovës në futboll. Prishtina me këtë fitore mbetet në vendin e parë me 56 pikë të tubuara. Besa renditet e gjashta me 39 pikë.

Mbrojtësi Adnan Haxhaj, në minutën e 17-të, hapi serinë e golave për Prishtinën. Ai shënoi me kokë pas harkimit të Faton Zejnullahut nga goditja e lirë. Dy minuta më vonë Driton Krasniqi shënoi nga 18 metra largësi me goditje të saktë, pas një topi të pranuar nga Zejnullahu. Në minutën e 30-të Prishtina ngriti epërsinë në 3:0, nëpërmjet Mentor Mazrekajt. Ai me goditje të saktë nga afërsia mposhti portierin e Besës, Valmir Bytyçi. Golin e katërt për Prishtinën e shënoi Astrit Fazliu nga afërsia. Zejnullahu ishte sërish asistues. Zejnullahu shënoi golin e fundit për vendasit në minutën e 56-të, pasi përfitoi nga një gabim i Bekim Bajraktarit. Dy minuta më vonë Zejnullahu qëlloi shtyllën.

Ndërkohë golin e vetëm për Besën e Pejës e shënoi kapiteni Haxhi Zeka në minutën e 90-të, me goditje të saktë prej 20 metrave.