Blanc drejt Interit

Përgatitjet e Përfaqësueses së Kosovës nën drejtimin e përzgjedhësit Arben Krasniqi dhe ndihmësit të tij Albert Sylejmani janë duke shkuar sipas plan- programit të paraparë. Një gjë të tillë e ka pohuar edhe Granit Rugova basketbollist i Sigal Prishtinës, njëkohësisht anëtar i Përfaqësueses kosovare. “Përgatitjet janë duke shkuar ashtu si duhet. Po mundohemi t'i shfrytëzojmë sa më shumë ditët që i kemi në dispozicion. Secili është duke e dhënë më të mirën nga vetja, në mënyrë që të komponohemi sa më mirë në prag të takimeve që na presin”�, ka thënë Rugova. Përfaqësuesja e Kosovës do të zhvillojë ndeshje miqësore në Turqi prej 5 deri më 10 korrik, ku do të takohen nga dy herë me kombëtaren e Libisë dhe Sirisë. Përgatitjet e përbashkëta përfaqësuesja kosovare i ka filluar më 28 qershor dhe do të zgjasin deri më 4 korrik në Prishtinë. Në emëroren e gjerë përzgjedhësi Krasniqi së bashku me ndihmësin Sylejmani kanë ftuar 17 basketbollistë, ndërsa do të udhëtojnë vetëm 12 prej tyre. Sa i përket ballafaqimeve që i presin në Stamboll, basketbollisti prishtinas theksoi: “Libia dhe Siria kanë skuadra të mira që përbëhen nga basketbollistë mjaft cilësor. Kam dëgjuar se Libia në radhët e saj i ka pesë amerikanë të natyralizuar dhe po ashtu trajnerin e ka amerikan. Megjithatë ne do të japim më të mirën nga vetja dhe do të bëjmë çmos që të prezantojmë vendin tonë ashtu si duhet. Na mbetet vetëm të përqendrohemi dhe të angazhohemi në çdo ndeshje”�. Kjo ftesë e bërë në adresë të Përfaqësueses kosovare ka ardhur vetëm pak ditë pas pjesëmarrjes së Përfaqësueses së të rinjve të Kosovës në turneun ndërkombëtar “Lojërat e Miqësisë”�, në Izrael. “Këto ftesa janë të mirëseardhura për neve basketbollistëve, sepse në këtë mënyrë do të fitojmë më shumë përvojë në arenën ndërkombëtare. Megjithatë dua të theksoj se kjo është edhe meritë e Federatës së Basketbollit të Kosovës, që po angazhohet maksimalisht për të gjetur mënyrën për të qenë sa më pranë basketbollit evropian dhe atij botëror”�, ka përfunduar Granit Rugova.
E. DUSHKU